Arbeidarpartiet blei i dag einige med Sp og SV om revidert nasjonalbudsjett. Her kjem det ei øyremerking på 200 millionar til betre bemanning i barnehagane.

Det er første gong på fleire år at slike midlar ikkje berre går inn i kommunane sine frie rammer, men blir bundne direkte til formålet.

– Det er heilt avgjerande at desse midlane er øyremerkte. Erfaringane frå førre budsjett viser at altfor mange kommunar ikkje nyttar midlane til det dei var tiltenkt utan ei slik føring, seier Geir Røsvoll.

Har lytta til innvendingane

Røsvoll er òg tydeleg på at regjeringa gjorde rett i å ikkje vedta gratis barnehage i denne omgang, sjølv om SV krevde dette i forhandlingane. Foreldreprisen blir derimot redusert frå 2000 til 1200 kroner.

– Eg er glad for at det ikkje vart vedteke gratis barnehage. Det ville vore ei feilprioritering å bruke store summar på gratis tilbod før bemanningskrisa er løyst. Det handlar først og fremst om tryggleik og kvalitet for barna, seier han.

I fjor sikra SV gjennomslag for at til saman 800 millionar kroner av rammetilskotet for 2025 skulle gå til auka bemanning i barnehagane – ein sum som tilsvarer om lag eitt tusen barnehagelærarårsverk. Men sidan midlane ikkje vart øyremerkte, var det opp til kommunane sjølve å disponere dei.

– At vi no får ei øyremerking, viser at regjeringa og samarbeidspartiane har lytta til dei faglege innvendingane. Det gir eit håp om at pengane faktisk vil komme barna og dei tilsette i barnehagen til gode, seier Røsvoll.

Utdanningsforbundet meiner likevel at det framleis er langt fram før ein kan snakke om ei løyst bemanningskrise. Det mangler i dag 2700 barnehagelærare.

– Vi har med dette budsjettet kome eit steg vidare, men vi er på ingen måte i mål. For å løyse krisa trengst det nærmare fem milliardar kroner. Dette må vere den viktigaste saka for alle politiske parti framover, understrekar Røsvoll.

Håp om løysingar i nytt utval

– Eg er også veldig nøgd med at ein dobler løyvinga til vårt viktigaste verktøy for å få ned sjukefråværet: IA-bransjeprogram for barnehage, seier Røsvoll, som påpeikar at Utdanningsforbundet har jobba for ei slik prioritering. 

Om lag 2000 barnehagar har dei siste åra deltatt i IA-bransjeprogram barnehage, der Utdanningsforbundet er ein av partane. Gjennom deltaking i bransjeprogrammet har mellom anna mange barnehagar lukkast med å redusere sjukefråværet. Barnehagar har i dag eitt av dei høgaste sykefråværa i offentleg sektor i Noreg.

Utdanningsforbundet ser òg positivt på etableringa av eit partssamansett utval for barnehage, som vart varsla i samband med budsjettenigheita.

– Det utvalet kan bli viktig, og vi har store forventningar til at bemanningssituasjonen blir den fremste saka det skal jobbe med. Barna våre har ikkje tid til å vente, avsluttar Røsvoll.