Eg ser fram til å få spela det musikkstykket eg eigentleg skulle ha framført på årsmøtet som blei avlyst. Det betyr at eg må halda det gåande med øving utover «when summer`s in the meadow». 

Når AFP-en slår inn 1. august, blir altså musikken noe av det som kjem i staden for tillitsvaldarbeidet. Å ha fått vore lokallagsleiar og HTV i 13/14 år, har vore svært lærerikt for meg - det blir som å få stå i front for all jobbing, samarbeid og engasjementet til medlemmer og tillitsvalde i lokallaget, noe som kan samanliknast med den oppgåva ein orkesterdirigent har.

Då eg som utflytta jørpelending, kom frå Hardanger i 1984 som temmeleg fersk lærar, såg eg det som heilt naudsynt, at eg måtte ta den ledige dirigentjobben i Sauda skolekorps, på toppen av lærarstillinga, for å ha håp om fast lærerjobb - her inst i røyndomen. Etter noen år fekk eg tillitsverv i Lærarlaget og var med som klubbleiar og styremedlem. Då lokallaget etter ekstraordinært årsmøte i 2006 mangla HTV, sa eg meg villig til å gå inn i vervet samt å bli nestleiar. Leiar blei eg året etter. Samarbeidet opp mot Nettverk Nord, Ryfylke-nettverket, fylkeslaget og sentralleddet har vore eineståande - ein spesiell takk til Utdanningsforbundet Suldal og min gode tillitsvaldkollega Rolf Meland i Hjelmeland.

Takk til nestleiarane Roar Lund, Bente Dolmen Wigelius og Anne Irene Saua som har bidratt godt til at me i Utdanningsforbundet Sauda har fått markert oss i lokalsamfunnet og jobba for vilkåra til medlemmene i barnehage, skule og støttesystem. Takk òg til pensjonistkontakt Aile Sahr Volden for eit flott og utviklande samarbeid. Takk til netthøvding Knut Atle Seim alias Geronimo og Martijn Bellemakers aka Spiderman Friendly Neighbor for framifrå arbeid med lokallaget si heimeside for meg som Rawhide. Og ikkje minst takk for alle konstruktive møte og dialogar med de tillitsvalde og medlemmer. Takk for alle delte erfaringar, tilbakemeldingar og innspel!

I den koronatida som har vore, er eg imponert over den dedikerte og innovative jobben som de lærarar og leiarar i barnehage og skule har stått for. Keep up the good work, men hugs at de har eit lov og avtaleverk som skal vera føresetnadane for at de kan stå i dette løpet, både i ekstraordinære tider og når ting roar seg! Elles håpar eg at skulen min, der eg har undervist i musikk og kroppsøving, får tak i minst to mannlege lærarar. I tillegg set eg min lit til at Sauda kommune set barn og unge først framover.

Takk til administrasjonen og politikarane som har lytta til bodskapen min på dette feltet og prøver å få til eit bærekraftig framtidig lokalsamfunn.

For meg er det fint å pensjonera seg nå, når lokallaget går vidare med eit styre og tillitsvaldapparat med god kontinuitet og kompetanse, med Stefan Moen Søfting i spissen. Lukke til med å bygga framtida!

Ha ein riktig god sommar alle!

Aktuelt:

• Varmt vennskap
• Kreativt samarbeid