Arbeidsforskingsinstituttet, AFI, har levert ein rapport til Kunnskapsdepartementet. Rapporten er ei gransking av arbeidstida til vitskapleg tilsette i heile stillingar ved universiteta og høgskulane i landet. Rapporten viser at dei arbeidar langt utover den avtalefesta arbeidstida for tilsette i staten.

Staten må ta ansvar
AFI sine tal viser at vitskapleg tilsette innan sektoren arbeidar 47,6 timar kvar veke i gjennomsnitt.

- Dette går langt ut over det Arbeidsmiljølova tillét, seier Magne Rydland, sentralstyremedlem i Utdanningsforbundet med særleg ansvar for UH-sektoren, og held fram;

- Vi forventar at Staten som arbeidsgivar snarast råd er tek ansvaret for å leggja til rette for at forskingsplikta vert synleggjort som ein legitim del av normalarbeidsdagen. At staten skal sitje i ein slik posisjon at dei som arbeidsgivar pressar tilsette til å utføra heilt nødvendig arbeid på fritida, er ikkje til å leve med, seier han.

Same resultat i andre granskingar
Forskarforbundet og Utdanningsforbundet har kvar for seg, men i nær forståing med kvarandre, fått gjort granskingar som syner det same resultatet i svært stor grad. Talmaterialet til Forskarforbundet og Utdanningsforbundet vart samla inn frå medlemmane i sektoren i 2009 og 2010. Frå departementalt hald møtte organisasjonane liten grad av anerkjenning for dette.

- At AFI nå kjem til same resultat syner at vi ikkje var «heilt på viddene», seier Rydland.

Granskinga syner og at vitskapeleg tilsette brukar i underkant av 11 prosent av arbeidsdagen til forsking, altså det arbeidsgivaren betalar løn for. Resten går av fritida og er ulønna.

Utdanningsforbundet er heilt samd med Forskarforbundet i at forskingsplikta, jamfør Lov om universitet og høgskular, må kunna utførast innanfor normalarbeidsdagen.